هل سيستخدم الذكاء الإصطناعي في إدارة الهجرة ؟قصة قصيرة : ” يسفرونك يا حجي “
– ملّينا يا شيخ ، كل يوم والتاني تحديث بيانات ، وبصمة ، وطلب اذن ، يمكن يعطوك ويمكن ما يعطوك ، وحارات كلا مسكرة ، وولايات محظورة ، وخليها عربك خيو .
– له له ، لك ليش هيك عنكم ؟! نحنا ماعنا هالشي ابداً ؟ لسا لهلق عم تروحو تبصمو ؟ وتحدثو ؟ وتطلبو اذن سفر من الموظفين كمان ؟
– ليش انتو مو نفس الشي ، متل عنا يعني ؟
– لا والله يا صاحبي أبداً مو متل عنكم ..
– هات لنشوف ؟ كيف بتحدثو بياناتكم ؟
– يا سيدي عنا من فترة لزقو بايد كل واحد شريحة ، يعني بيعرفوك وين ساكن بالضبط ، ومافي دور لتحديث البيانات ، وكل ما هنالك انك بتصور حالك وبتصور ولادك صور للهوية وتحملهم عالتطبيق تبع تحديث البيانات . اما مشان التحديثات التانية وتعباية الفراغات تبع التحديثات ، اذا ما بتعرف تكتب بالتركي كتوب بالعربي بترجمها تلقائياً، واذا ما بتعرف تكتب بالعربي كمان فيك تحكي وهوي بحولك الحكي لكتابة حتى لو حكيتو بكل اللهجات العربية .
اذا عندك دفتر عيلة أو أي شهادة، رح يطلب البرنامج منك تحمل صورتها ، وبعدين هوي بيتحقق منها بطريقتو وبيعرفها اذا نظامية أو مزورة .
– طيب شو مشان بصمة الأطفال ؟
– خليني كمل طيب .. البصمة تبع الأطفال كمان من خلال الجوال والتطبيق ، بيفتحلك صفحة البصمة وتبصم اصبع اصبع وبنبهك اذا ما زبطت البصمة ، وآخر شي بقلك خلصنا تحديث، والكمالك الحديثة والمختومة بيوصلوك بكرا عالبيت بالبريد .
– والكمالك القديمة ، ما بتسلمها ؟
– لا تخاف ، بيجبرك تتلفها لحالك ، لأنو بيعرف الكملك القديم مو صعب عليه .
– طيب شو مشان البصمة الشهرية ؟ لا تقلي عم تبصمو عن طريق جهاز الموبايل كمان !!
– لا لا يا عمي .. هلق قلي لشوف شو الغاية من البصمة الشهرية ؟ مو مشان نضل بولاياتنا وما نطلع بدون اذن سفر ؟
– اي اكيد ، هيك الغاية .
– طيب ، لشو نبصم عالجهاز ؟ مادام في بايدينا شريحة بيعرفو من خلالها وين نحنا وبأي موقع بالضبط .
– يعني حدا جرب يطلع برا الولاية مثلا بدون اذن سفر ؟
– أكيد في كم واحد حاولو .. بس ما زبطت معهم . يعني بس وصلو عحدود الولاية ، طلع صوت منبه من الشريحة ، وعطت اشارة لاقرب مركز جندرمة او بوليس ، طبعا اجو اخدوه بعد ما حددو موقعو عل ج ب س .
– طيب كيف بتاخدو اذن سفر ؟
– سهلة ، عالموبايل ، نفس طريقة الايدولت ، بتحط الوثائق تبعك وبيتأكد منها اذا صحيحة ، وبيعطيك عولاية مفتوحة ، وبيرفض الاذن عالولايات المحظورة الا اذا اقتنع بالوثائق تبعك.
– وشو مشان سيارة الترحيل ؟ يعني كيف بيمسكو الأشخاص المخالفين وهني ماعندن كملك أو مافي بإيدهم شريحة الكترونية ولا شي ؟
– يا سيدي هاي السيارة الحمرا الطويلة مافي منها منفد ولا مهرب ابداً … يعني بتكون ماشي بأمان الله بتلاقي السيارة الحمرا صارت جنبك ..
– اي ؟
– اي ، وطبعاً السيارة فاضية لافيها شوفير ولا شي . فيها مكبر صوت بيطلب منك تقرب من السيارة وتطلع فيها ، وجوا رح يطلب منك ربوت انك تبصم عجهاز البصمة مشان يتأكد من وضعك اذا نظامي او غير نظامي ..
– إي ؟ وإذا كنت غير نظامي ؟
– يجولونك .. يعني بتلاقي فجأة انقفل باب السيارة لحالو ، وبتصير السيارة تمشي لحالها حتى توصل لأقرب مخفر ، وبعدن بشيلوك عمركز الترحيل، ومن هنيك برحلوك عسوريا .
– يا ربي دخيلك ؟ والله عجيبة هالسيارة ؟ طيب كيف بيعرفوني إني سوري ؟
– من مشيتك يا حجي … عم قلك هاد ذكاء اصطناعي ..
